الأحد، 26 أبريل 2015

اشتاتاً اشتوت

في ناس كده اللهم احفظنا تحس انهم ملبوسين او معفرتين والله اعلم. يصحى الصبح في يوم كده تلاقيه ظريف ولطيف ويسلم علي الناس كلها و الابتسامة تحس انها قاسمه وشه نصين بالعرض و يوم تاني او في نفس اليوم و ساعات في نفس الدقيقة برضه عينه في عينك كده و يقوم مدور وشه و ماشي ولا كأنه يعرفك.
ناس تانية بقه تلاقي يقولك انا هعملك و هسويلك و اللي تأمر بيه و هكذا وبعدبن لما تيجي تقوله فين يقولك فين ايه؟! هو انا قلت كده؟! و النيعمه ما حصل (فقدان مفاجئ في الذاكره)
ناس تالته بقه تقولك بحبك و بموت فيك و لو طلبت نجوم السمه اجبهالك، و لما تطلب منه طلب يعمل من بنها.
طب ليه هه ليه؟!
يعني خليك ثابت علي مبدأ يا تسلم يا متسلمش، يا تبقى قد وعدك يا متوعدش، يا تبقى اد كلامك يا مطنطقش .
مش انت لوحدك اللي عنده مشاكل عشان  تكشر في وش خلق الله او تعمل نفسك مش شايفهم عشان انت ((out of mood يعني تمت برمجتك علي مش هسلم علي حد.
اللي عمل نفسه شنتل مان او شنتل وومن برضه (يعني هي صغيره) ويقولك سيب المشكله او الحاجه دي عليا ده انا مفيش زيي اتنين فيها وهوب يصاب بالزهايمر المفاجئ متعملش فيها معلم وانت لسه يا دوب بتتعلم ( ده انا عليا جُمل :P (
نيجي بقه للناس اللي كلمها حاجه و فعلاها يعني حاجه *$%^*&^@*%^$# برضه بس تانيه خاااااالص احب اوجه رساله من موقعي هذا ACTION SPEAKS LOUDER اه الله زمبئولك كده.
وهنيالك يا فاعل الخير والثواب :D

الاثنين، 20 أبريل 2015

يمين وشمال

فرق كبير اوي بين الدبلة في اليمين ولا الشمال عند الولاد والبنات.
بالنسبة  للبنات ((ladies first J وموضوع ليه  ladies first ده عاوز موضوع لوحده نتكلم عليه.

-         الدبلة في اليمين:

-          تبقى البنت لابسة الحته اللي علي الحبل بقه و شوياكه وميك اب (بغض النظر شكل الميك اب ايه برضه)
-          يخرجوا يقعدا في مكان رومانسي يتكلموا عن مستقبلهم و خروجاتهم و حياتهم بعد الجواز و تقعد تقوله ده انا هخليلك حياتك جنه يا روحي (ابقى قابلني) مش هنام غير لما اطمن علي راحتك (الراحة الابديه)
-          و فجأه تسمع بصوت واطي (تسوو) ايه ده يا حببتي تقولك سوري يا روحي كنت بعطس، دايقتك؟
-          ولو طلبتوا اكل بقه تاكل بطرف الشوكه  وكأنها بتبوسها و تاكل معلقتين و تقولك اوففف اكلت كتييير اوي يا bbe.
-          لو دخلتوا سينما و حصل اي منظر دموي يغمن عليها علي طول.

-         الدبلة في الشمال:

-          اللبس عباره عن بنطلون بجاما كستور ورثاها عن جدها وتيشرت  يفكرك عكت قصدي طبختلك ايه طول الاسبوع
-          الكلام كله ان المصروف مبيكفيش طلبات البيت وهي بتتكلم تلاقي فجأه الدنيا مطرت و هبت عواصف ورياح من حيث لا تدري (هاتشووووووووووووو) المودام عطست!!
-          الاكل عباره عن كائن بدائي بيأكل بحواسه الخمسه (انت وخيالك بقه)
-          يعني ايه سينما؟؟
بالنسبة للرجال (الدبلة في اليمين):
-          شياكه وساعه وبرفان و شوز واو.
-          بزخ السنين في كل الخروجات.
-          التحدث في كل الخروجات المستقبليه بصيغه (احنا و سوا و مع بعض)
-          وقت الاكل تسيبوا اصلا و تتفرج عليها وهي بيتاكل وتمطرها ببعض الكلام الرومانسي (ميضرش)
-          طلباتها اوامر حتي لو اضطريت تكتب شيكات علي بياض.
-          هدايا مناسبه و من غير مناسبة.
الدبلة في الشمال:
-          اللبس عبارة  عن بواقي بيجامتين معتز بيهم من ثانويه عامه و من صعب التعرف علي لونهم في الوقت
        الحالي لا يخلوا من بعض الطاقات  والشبابيك للتهويه J
-   الخروجات حرف النون طاااار في ثانيه :D
-          الفلوس الي كانت ببترمي يمين وشمال دي تقريبا كده عملهم عصافير و غربان وطاروا (في ايه معرفش)
-          وقت الاكل بيبقي ذكر الكائن السابق ذكره (تاخد الطبق منهم فلة، على الرشائه علي طول)
-          بالنسبه للطلبات (يحبسها في البيت من غير اكل ولا شرب لحد ما ياخد الشيكات Jاللي علي بياض
-          الهدايا تحولت من خاصية الارسال الي خاصيه الاستهبال
و يا بخت من وفق راسين في الحلال :P


السبت، 11 أبريل 2015

عيد شم الفسيخ - شم النسيم سابقا -


غنت سعاد حسني زمان، الدنيا ربيع والجو بديع (في عيد الربيع) بغض النظر ان الجو ولا هو ربيع ولا بديع من اساسه وان فصل الشتا عمل REWIND، ده غير ان عيد شم الفسيخ  اللي هو عيد الربيع ولا EASTER علي رأى اخواننا الفرنجه قرب، كل سنه وانتوا شامين ان شاء الله، العيد ده له طقوس خاصه وعزيزه علي كل مصري منها طبعا قبليها بأسبوع تحضير العده زي نقع  الترمس والفول واللف علي الفسخانيه يدوروا على الفسيخ اللي رحته اوحش ياخدوه عشان متفسخ اكتر مثلا ، والله ما اعرف انهي الفسيخ الاحسن اللي رحتوا وحشه ولا اوحش ما علينا، الي جانب طبعا البصل و البيض واي منتج غذائي ينتج عنه غاز الميثااان (افهموها انتوا بقه) ليه معرفش ده لو جمعوا المكونات دي كلها (بيض وبصل وفسيخ وترمس وفول) هينتج عنه غاز يقضي علي السلاله البشريه جمعاااااااء. ليه كده يا جماعه ليه؟ نفسي افهم ميين اللي اخترع و طلع بالفكره ال..... النيره دي.
نرجع بقه ليوم العيد نفسه نلاقي العيله كلها ملمومه علي المكونات دي وهاتك يا اكل بغض النظر عن العواقب اللي انا شيفاها ان الواحد بعديها المفروض مينزلش من بيته 3 ايام لحد ما تزول عنه كل الاعراض رأفة بالبشر اللي حواليه  ده غير انك لو رحت زرت ناس في خلال الاسبوع ده (انفد بجلدك) يا بياكلوا فسيخ يا اكلوا (كل واحد وخياله بقه) هيشم ايه قصدي هيشوف ايه.
الحل: خد اجازه من شغلك اسبوع الي ان تنتهي هذه الاعراض، انا شخصيا بعمل زي WILL SMITH  في I am  legend. قعد في البانيوومعاه الرشاش بتاعه واقفل البيبان والشيابيك الي ان يختفي آكلي لحوم الفسيخ

وربنا ينتقم من اللي كان السبب :D

الجمعة، 10 أبريل 2015

غرام وانتقام


من وجهة نظر البنت:
البنت قبل الجواز بيبقى عندها احلام واماني اللي هتححقها مع الامير اللي هيختاره قلبها اللي هو يا شبه جورج كلوني يا براد بيت  (علي اساس انها انجلينا جولي طبعا )، من الاحلام دي شقه و عربيه و لاسيما يعني سفر كل سنه في حته شكل ده غير انها هتخليه يحب كل حاجه هي بتحبها والعكس صحيح (هيييييييييح)، نرجع لارض الواقع بعد كام سنه ياعبيييييييير انت يا هااااااانم فيين فردة الشراب الفحلقي بتاعي، والله عال مافيش حاجه في مكانها في البيت ده، ايه ده مالك كده هه مالك؟ بقيتي مبهدلة فنفسك و فشكلتي كده و شعرك منكوش. ويكون هو كرشه طالع 3 متر قدام ممكن تفرشي عليه سفره لتلت افراد مرتاحين ودقنه ولا اهل الكهف تعرفي منها هو اكل وشرب ايه طول اليوم وحضرتك طول النهار ما بين طبيخ وغسيل ومواعين و تنضيف ورا سعادته وعياله و مش بتفضي حته تبصي في المرايه ده ان كنت لسه  فاكره مرايه يعني ايه.
من وجهه نظر الراجل:
الراجل قبل الجواز احلامه بالاميره بتعاته تبقي mix بين (امينه من بين القصرين وهيفا وهبي من .... بلاش عشان الرقابة وانها هتفهمه وتقدره و تخلي حياته جنه وتلبسه وتتشيكله طول النهار والليل و يحوش فلوس من مرتبه (ازاي معرفش) وياسلام بقه لو كانت بتنور في الضلمه كده  بقت ((full option
الواقع: يا حسين يا حسيييييين فين اللحمه اللي طلبتها والمكرونه و3كيلو الطماطم وراس الكرنبه و البتينجااااان واعمل حسابك انا عاوزه فلوس عشان اشتري فستان لخطوبة بنت عم ابن خالة ماما  ولما يقولها راجع تعبان ومفيش فلوس لكل ده، تتبرمج علي اسطوانة انت متجوزني تبهدلني ولا تجوعني ولا عاوز يقولو عليا ايه لما يشفوني لبست نفس الفستان مرتين!!! وانت تكون عندك بدله((multi tasking واحده لكل المناسبات
وجهة نظري انا:
متجوزيش الا لو كنت بتحبي عيوب خطيبك قبل مميزاته، متتجوزيش عشان خاطر عاوزه بنك متنقل او وسيلة لتحقيق رغبات وهوياتك من دون مراعاه لظروفه، ممتجوزيش الا لو كان بيخاف عليك بجد مش بيخاف عليك عشان تعرفي تخدميه و بيحب جوهرك مش مظهرك الخارجي، متتجوزيش الا لو كنت شايفه كرشه ده اكبر دليل انه بيحب اكلك. متتجوزيس الا لو كان عارف قيمتك و بيعاملك زي ملكته مش مليكته. لان ببساطه لو كل ده بيحصلك يبقى للاسف اخترتي غلط ومتجيش بعد كده تشتكي وتقولي كنت بحسب اني هقدر اغيره (كان غيرك اشطر)
متتجوزش لو كنت فاكر ان الجواز وسيله للرفاهيه بجميع انواها و انك هتبقى سي السيد و مش مطلوب منك غير انك تاكل و تشرب وتنام وتخرج (لوحدك طبعا)، ممتجوزش لو كنت عاوزها جاريه و طباخه وغساله وخدامه ليك ولولادك اتجوزها عشان بتحب اكلها اللي هي تعبانه فيه طول النهار وعملاه برجليها قصدي باديها وان سبب فشكلتها انها جابت لك ثلاث اربع قرود شبهك قصدي شبهكم انتوا الاتنين (علي الحياد اهه):D اتجوزها عشان انت بتحبها وعاوز تكمل عمرك معاها وهي منكوشه ومبهدلة ومفشكلة وريحتها طبيخ ولبن ودوا في آن واحد ومع ذلك هي في نظرك ملكة جمال الكون كلة.
وربنا يقدرنا علي فعل الخير :)


الأربعاء، 8 أبريل 2015

حواء والسيلفي


ظهرت ظاهرة جديده في سماء المحروسه وعلي رأس حواء تحديدا وهي السيلفي بعد ما كان الواحد بيحاول يداري انه بيصور نفسه حتي لو وصلت انه يربط الكاميرا في النجفه بايشارب الوالده و يظبتها علي السيلف تايمر (بغض النظر عن العواقب الوخيمه بعدها وصولا الي الشبشب الطائر)، وطبعا لكل ظاهره شروط يجب ات تتوافر بها :
-          Duck face: هو عباره عن بوز متين مع احمر شفاه بلون التوت البري
-          تاتو ببعض المناطق (الكتف او الرقبه) وجبت الظهور برضه للسوكسيه بقى وكته.
-          يجب ان تكوني دبه راسك في تورته كريمه او طبق الجبس من اللي تحت الحوض (حسب ما انت عاوزاه يكون long lasting ولا لأ:D)
-          العنين يا جماعه(سحر العيون) لازم يبقي winged eye liner  او مشروعwinged eye liner وفشل.
-          البوء بقه فتحاه تعدي منه عربيه نقل بدورين مع نظره بلاهه (قال يعني عامله متفاجأه)
-          لو حضرتك سمراء لازم تلعبي في effects الصوره باي شكل عشان تباني افتح (هتتقفشي برضه:P)
-          اخيرا بقه لازماً ولابد تكون في الحمااااام عشان تبقى في اكتر مكان بترتاحي فيه.
ياللا على رأي جدتي الله يرحمها دع الخلق للخالق تيجوا ناخد سيلفي بقه؟ ;)


الثلاثاء، 7 أبريل 2015

زحمه يا دنيا زحمه

زحمه يا دنيا زحمه، زحمه وتاهوا الحبايب، زحمه ولا عدش رحمه، مولد وصاحبه غااااايب.احم معلش يا جماعه اصل انجليت من هول المنظر. طبعا متصورين معايا انا شايفه ايه. ايوه ايوه عليك نووور في شوارع المحروسه العامره بالسكان، تحلف فعلا ان الناس كلها في الشارع وان محدش في بيته او ان في جمعيه استهلاكيه في كل شارع بتوزع اللحمه والفراخ ببلاش. بهزر يا جماعه لحسن حد ينزل يدور و هي مش ناقصه،  اولا لو حضرتك من راكبي المواصلات زي حالاتي سواء كانت السلحفا الزرقاء (قصدي الترام او المترو)، تاكسي او مشروع او مكروباااظ زي ما بسمعها في قاهرة المعز :D. اولا السلحفا تحط وقت تقريبي للوصول لوجهة حضرتك من 3 الي اربع ساعات إن كانت الست الوالده دعيالك اما لو كانت مش راضيه عليك فمش هتلاقي ترام اصلا لانهم عاملين اضراب اليوم ده.اما التاكسي ده نوع من انواع السرقه عيني عينك كده برضا الزبون يعني لامؤاخذه بناخد علي افانا واحنا راضيين عادي كده لانك مضطر توصل في معادك مظبوط (ابقي قابلني) اخيرا المشروع او المكروبص انا بعتبره وسيله للانتحار مش وسيلة مواصلات لانك يا هتدخل بيه غطس في البحر يا اما غطس برضه بس في العربيه اللي قدامك او تموت مخنوق من ريحه عرق اللي جنبك :s.  ثانيا راكبي المواصلات الخاصه زي العربيات لو ربنا كرمك بعربيه متفرحش اوي كده لانك هتعدي بكل ده زائد مشكله اخرى زي مشكله الركنه اللي انا شخصيا من وجهة نظري المتواضعه المتناهيه J لازم يبقى عندك فراسة ومهارة لاسد اللي مكلش بقاله اسبوع و بيدور علي فريسه لو ربنا كرمك ولقيت الفريسه قصدي الركنه يا اما هتتكلبش يا اما هيجي حد غتت ورخم يركن عربيته قدامك بحجة ان مفيش ركنه تانيه و هتروح بمواصلة وطبعا كل ده وانت قاعد بتستغفر وده هو الهدف انك تقرب من ربنا كده و تكفر عن ذنوبك اللي معملتهاش بس ممكن تعملها برضه الاحتياط واجب J و بكده حلينا مشكلة اخرى ولله الحمد.

الاثنين، 6 أبريل 2015

الميه والهوا


على رأي الست ليلى مراد "بحب اتنين سوا يا هنايا في حبهم الميه والهوا" من هذا المنطلق هنبتدي اول حدوته و هي بتمسنا جميعا بس من منظور اخر الحقيقه المييييييييه والنوووور والنور ده يشمل المروحه او التكييف (الهوا :)، ايوه انا كنت بسمع الاغنيه دي بشكل ومعرفش ليه بقيت اسمعها بشكل تاني و معاني تانيه خالص، اه والله زمبئولكم كده. وياسلام بقه لو عندك ميعاد مهم ومحتاج تروح في معادك مظبوط و(محدش يفهمني غلط في ميعاد دي هه) ;) ممكن يكون معاد شغل مثلا او واحد رايح للترزي او واحده رايحه للخياطه وارد برضه;) هوب اولا يا اما النور يقطع على سعادتك في الاسانسير او وانت بتلبس و ده ممكن طبعا او وحضرتك واقفه في المطبخ و بتحضري الفطار في رمضان او الغداء بعد الظهر وده وارد برضه و ياسلام بقه لو ساكنه في دور عالي زي حالاتي

بيكون مش نور بس لأ و ميه كمان والمفروض اني اتيمم بقه لو اتخبط في دماغي و عاوزه اخد دش ولا اتوضا و لا حته اغسل وشي و لو عندك بيبي صغير عاوز يغير دي بقى كارثه! و طبعا الحل اخبط دماغك في اكبر حيطه او ظهر السرير لو كان كابتونيه عشان الاصابات مش هيبقى من كله (اللهم بلغت )  :D طب ليه هه ليه؟؟؟ انا مش طالبه غير الحياه البسيطه خالص ميه ونور مقولتش عاوزه تكييف ولا جاكوزي في الحمام!! بس بيني و بينكم احنا ضيقيين الافق و بنبص تحت رجلينا، مش احنا بنشتكي من الاسعار اهه لما الميه والنور يقطعوا الفاتوره هتجيلك اقل و بكده حلينا مشكلتين والحمدلله