الاثنين، 2 نوفمبر، 2015

حلم الثلاثين


 بما انني انا و كتيير من صحابي في الثلاثين او على مشارف العقد الثالث. اسمحولي ابارك لنا جميعا على قتل وهم بعبع الثلاثين اللي كان واهمنا كلنا، "يااه عاوز اعمل كذا و كذا قبل ما اتم الثلاثين!"
اولا لما كنا لسه في اوائل العشرينات كان قدمنا كتير من العوائق بتقف قدام احلامنا زي الدراسه، تردداتك اللي مش بتخلص في اي قرار، تحكمات الاكبر سناً لانهم انضج و اعقل منك و خبرة قي الحياه افضل.
وصلت للتلاتين "ياااه حياااه" "والحقيقه المرحله دي ليها مميزات اكتر من عيوب و علي سبيل... الايجابيه هذكر المميزات فقط لان العيوب تكاد لا تًٌذكٓر.
١- اول حاجه هتعملها هتضحك وتضرب كف على كف لما تفتكر تفكيرك و قراراتك في العشر سنين اللي فاتوا 😆، لانك ببساطه وصلت للنضج العقلي و العاطفي اللي يوصلوك للقرار الصح.
٢- مبقاش في حد يقدر يستغل عواطفك ولا يضحك على عقلك
٣- بقيت تقدر تتحمل مسئولية قراراتك ١٠٠٪ من غير ما تلوم على حد.
٤- تقدر/ تقدري تلف العالم كله من غير ما حد يقولك لسه صغير او طب و مذاكرتك و دراستك.
٥- لو مكنتش اتجوزت و جبت قرود فأنت خال او عم / خالة او عمة و في الحالتين ام او اب للقرود اللي بيتشعلقوا فيك اول ما يشفوك، وحسيت اكتر بحب ام و ابوك وخلانك وخلاتك و عمامك و عماتك بيحبوك ازاي لانك حاسس احساسهم.
٦- الي هيتجوز في المرحله دي عنده مميزات اكتر من اللي اتجوز في العشرينات، لانه هيبقه متأكد من قراره اكتر و لما يجيب اطفال هيقدر يربيهم بالطريقه الصح و الانسب.
٧- احساس بأستقرار في شغلك و انك عاوز تثبت نفسك فيه بدل ما كنت بتتنطط من وظيفه للتانيه عشان زهقت، او كنت فاكر من اول شهرين هيعينوك مدير الشركه زي ما كان بيحصل في الافلام.
٨- بقيت تتقبل الواقع بشكل افضل وقادر تحسنه.
٩- بقه يتقال لك عمو او طنط من طفل طولك بتاع ١٠ سنين وانت مبسوط لانك كنت بتعمل زيه.
١٠ - اه مسؤلياتك زادت بس انت قدها.

‫#‏حلم_الثلاثين‬
‫#‏احلى_سنين‬
‫#‏بسمة_المصري‬

معجم المرأه


 تعددت النساء و الفكر واحد
بص يا استاذي المرأه بشكل خاص ليها مفتاح واحد!! اه والله كده
الا وهو الاهتمااااام، اهتميت بيها انسى بقه النكد انسي انها تنسالك طلب، انسي النقاش حتى، جرب كده والله و هتدعيلي.
في حد ممكن يسأك و انا اعرف منيين بقه انا مهتم بيها ولا لأ؟!...
في شوية حاجات كده لو قالتها اعرف انه دق ناقوس الخطر
لما الست تقولك قولي كلمه حلوه او لو سألتك بتحبها ولا لأ = فقدان الاهتمام و فقدان الاحساس بالامان.
لو لاقيت ابتسامتها اللي كانت منوره وشها ايام الخطوبه دبلت واختفت.
لو اتحولت في بيتك لجماد ينفز ما يؤمر به دون ابداء رأي او مشاعر.
لو بطلت حتى انها تعاتبك و فضلت الصمت 😶.
عزيزي الرجل انت مرآة زوجتك، يعني لو لقيتها مرتاحه و مبسوطه تبقه انت حققت الاهتمام بحببتك لو تعيسه و مهمومه تبقه لازم تحاول تهتم بيها.
مش لازم تجيب لها نجمه من السما او كريدت كارد مفتوح تعمل شوبنج ( لو قدرت كتر خيرك طبعا خصوصا موضوع الشوبنج ده) احم نرجع لموضوعنا 😆
ممكن يكون الاهتمام كلمه حلوه ( ومحدش يقول لي كنافه ولا بسبوسه 😠) بوكيه ورد لطيف، والله بركيه الورد اهم من كيلو الكباب يا اخوانا، يا سلام لو اثنيت على جمالها ولا لبسها و الأدها لو قولت لها خسيتي، ياااااه ساعتها هي اللي هتجبلك نجمه من السما.
ومحدش يقول لي اصل المسئوليات زادت عليا .. هي عندها مسئوليات اكتر و برضه بتهتم بيك
ببساطه لو انت فضلت مهتم بيها زي ايام الخطوبه اوتوماتيك كده هتلاقي قدامك البنوته الرقيقه الجميله اللي مهتمه بنفسها و بيتها
من الاخر انت بأيدك تعيش في الجنه او تعيش في النار.
#بسمة_المصري
 

الخميس، 13 أغسطس، 2015

بلا عنوان


بلا عنوان
عجبت على زمن يُدفَن فيه الحبَ
 لا تعرف الناس له دربَ
 وتولد وحوش ضاريةٌ
 تأكل القلوب بنهمِ
مخلفة احجار صواناٌ
 تنبُض قسوة وطمعُ
تجمد الحس الي صنمِ
 اذ اصابت البشرَ
 ولد العجز و المرضُ
تنشر الحزن الي الكثرِ
 من العدمِ
كثير الكلام لا يفعل
كثير الفعل بلا كَلِم
كثيرٌ وعدوا بالنجمِ
وحين الجد بلا قسمِ
البعض يردد اشعارا
تطالبه بما فاضَ
فجأه يصاب بالبكمِ
إذا احتجت لعطفٍ
اُصِيبوا بالشلل والصممِ
نسوا عفة الحبُ
سحره وسكرتهُ
وماذا عن قدرته
في نحويل الذئب الي غنمِ؟!

يموت الشباب بأسألته هل الحب حقيقة ام شائعةِ؟؟
#بقلم:_بسمة_المصري

الثلاثاء، 19 مايو، 2015

شرقي لا يُشرق:

كتير مننا اتفرج على فيلم بين القصرين او قرأ الروايا، نجيب محفوظ هنا مكتبش الروايا بغرض تسلية القارئ على قد ما حب تسليط الضوء على جانب مهم اوي (الرجل الشرقى) علي سبيل المثال لا الحصر. نبتدي من اول ما هو طفل صغير، يعمل اللي هو عاوزه و يتحكم في اخواته البنات بحجه انه عييييب اخوكي ولازم تسمعي كلامه، يكبر شويه يخرج ويجي البيت أي وقت ان شاء الله حتى ٤ الفجر على اساس انه قاعد في وكاله من غير بواب. في الجامعه نلاقي تليفونات تيجي من سوسو و ميمي ولولو وعادي على فكره هو ولد يكلم كل البنات، لما يفكر بقه يتأهل يجي يكتب في دعوة الفرح زواج البشمهندس عبقرينو على الانسة( N) ايه ده بقه ان شاء الله؟ بنلعب عروستي؟! ده علي اساس ان اسمها عوره بقه وكده ناهيك بقه لما يجي يتكلم عليها في اي حاجه(الجماعة، ام العيال، ام محروس، ام اسم النبي حرسه (ربنا الحارس يا حج) ايام الرسول عليه الصلاة والسلام كل الناس كانت عارفه اسماء زوجاته عادي عمر ما نداهم بغير اسمائهم ابدا ولا بيناديهم بأسماء ابنائهم. بعد الجواز بقه يقعد عنتر زماااانه ميشلش الريشه من على الارض بحجة ان ده شغل الست وان هو عليه يصرف وبس. هي عليها تأكل وتشرب وتدادي وممكن يطلب منها تحكيله حواديت زي شهريار كده. اه بتحصل بتحصل ده الواحد بيسمع العجب من اللي حواليه ههههه. ايام الخطوبة كان يفتح لها العربية و لو يطول يخرج معاها كل يوم، بعد الجواز ده ان ركبها معاه او قضى لها مشوار المفروض تصلي ركعتين شكر. مع ان الرسول عليه الصلاة و السلام كان بيركع علي رجلة و يخلي السيدة صفية زوجتة تطلع علي رجلة عشان تركب الجمل قدام الناس عادي. بالنسبة للي بينقب مراته غصب كده و يبقه هو مقضيها برة مع دي و ديطيب زي ما بتخاف علي مراتك خاف علي بنات الناس (مفيش خيار وفقوس اكابتن) والنقاب مش فرض ياخوننا والله، الرسول كانت زوجاته منقبات عشان محدش من الكفار يعرفهم و يأذيهم والرسول قال النقاب للي جملها يفتن الناس في الشارع (اكيد مش متجوز صوفيا لورين ) او وحشه اوي تفزع الناس (اكيد برضه لو كانت شمبنزي من النزهه مكنتش اتجوزتها) الرحمه حلوة برضه. اول ما يتجوزك امسحي كل الولاد من عندك على الفيس بوك و كل مواقع التواصل الاجتماعي وفي الشغل ده ان خلاها تشتغل عشان ميصحش و انها متعلمة 14 سنه من عمرها عشان تربي العيال في البيت، متكلمش اي حد من زمايلها في الشغل خالص ولا حتى صباح الخير. احب اسأل سؤال، لما انت مش واثق فيها و في اخلاقها اتجوزتها ليييييييييييه؟!!! ولا انت لقيت عندك وقت فراغ قلت تتجوز اهه حاجه تسليك كده بدل ما انت مش لاقي حد تنكد عليه؟ احب اقول حاجه للشريحه دي من الناس بص يا سيد، لو انت مش قد انك تشارك في مسئولية بيتك اكفي خيرك شرك احسن. لو انت مش قد تربية العيال متتجوزش من الاساس. لو انت مش هتعاملها زي ما بتعامل الست الوالدة بالحسنة يبقى سيبها في بيت ابوها معززة مكرمة. لو مش هتفضل تحبها طول عمرك زي ما حبتها اول ما عرفتها يبقه سيبها للي يقدرها لو مش هتفضل تفكرها كل ساعه وكل ثانية قد ايه هي مهمة بالنسبالك وانك مبسوط جنبها يبقه استنى لحد ما تحس بده بس كده :) واخيرا الكلام ده طبقا للدراسات ينطبق على اكثر من 20% من الرجال الشرقيين في مصر المحروسة. وربنا يهديهم يا يهديهم برضه :)

الخميس، 14 مايو، 2015

خائفة


خائفة من فتح قلبي
علي سراب ووهمِ
سبق ولملمتُ حطام قلبي
ولم يبق منه اي شيئِ
لكنهُ عاد من جديد
قلب وليد
تُري هل إن حب.. سيجُرحَ من جديد؟
لا اعلم الإجابه
ولكني انتظر الإستجابه
دعائي لربي بحبِ..يحيني من جديد.
‫#‏بسمه_المصري

سحر الكلمات

إن كان الحب كلمات __ فنبضات القلب ابيات
بكلمات من نسج مشاعرك __ تتفتح كل الطرقات
طرقات عشق و هوي __ سلكها قلبي و ارتمي
بوجودك حولي تتراقص __ دنياي مشكله احلي النغمات
رئيت بعينيك احلام __ توعدني باحلي الاوقات
تتراءى الدنيا باسمه __ ملونه بأشذي النسمات
يتضرع قلبي راجية __ بدعائي في كل الصلوات
ان اسكن قلبك دائمة __ ساكرة من سحر الكلمات
#بسمة_المصري

وجوه الحرية:




طيب نبتدي بسم الله كده، هنتلكم عن موضة قلع الحجاب، اولا بالنسبه للمحجبات اللي عماله تشتم وتلعن في الناججز اللي مخلي رجلها شبه قرطاس الشاورمه (طبعا اومال ايه لازمن امشي علي الموضه)
شكل الطرحه بقه يا اما علي شكل الفاسه كتهوت عشان يبان ايه ان البنت شعرها من طوله مش عارفه توديه فين الرسول عليه الصلاة والسلام قال عليكم (الكاسيات العاريات، رؤوسهم كأسنام الجمال)
يا اما بقه مربوطه ربطه الخدامين ورقبتها وودانها باينين مش مهم المهم شعرها متغطي (يااا شيخه)
مش عاوزين ننسى ان الحجاب بالنسبه لها مش فرض ولا في البلكونه ولا وهي بتفتح باب الشقه ولا لو اي ضيف جالهم اساسا، ايه يااخوانا هي في البيت وقاعده براحتها وهو الضيف اللي جه عادي بقه. غير ال4 كيلو ميك اب اللي تحس انها تشطيب سوبر لوكس ولو رزعتها قلم خداميني الدنيا هتضبب مش هتشوف ايدك اللي انت ضريتها بيها حتى.
انا مش بقول ان قلع الحجاب صح لانه طبعا لأ لانه فرض واضح بين في القرآن الكريم (وليضربن بخمورهن على جيوبهن) لو بصينا على كلمة خمار في المعجم يعني غطاء الرأس يعني ربنا عاوزنا نغطي راسنا والجيب يقصد به منطقه النحر (الرقبه) والصدر يعني ربنا بيقولك كل طه يبقه متغطي بحجابك عشان انت غاليه واوي كمان مش اي حد يشوفك غير جوزك زي اي حاجه غاليه عليك زي النيش يا ستي ههههه مش قافله على الكوبيات والاطباق بتاعتك مغطياها في مكان ومش اي حد يشوفها، شبكتك كش حطاها في علبه قطيفه وقافله عليها؟ مش بتغطيها مش بتخافي عليها؟!
هو ده حجابك
رساله بقه مني لكل البنات اللي لسه متحجبوش وده رأيي الشخصي لو مش مقتنعه بحجابك اللي هو فرض عليك متتحجبيش ايوه متتحجبيش عشان متجيش تقلعيه وتتحملي الذنب الضعف ممتحجبيش و تسيئ استخدامه و لمظهره واللي قلعته منها لربها، بدل ما تشتمي وتلعني بصي لنفسك و طوري من حجابك وحافظي عليه وادعي لها بالهدايا. ربنا خلقنا للعباده مش عشان نحاسب بعض و نغتاب بعض والحكم لله من قبل ومن بعد وربنا يهديني ويهديكم
‫#‏بسمة_المصري‬
س اللي عملوا كده اللي ممكن توصل 30% منهم لا يندرجوا باي شكل من الاشكال للحجاب اللي اتكلم عليه الاسلام ، اه لابسه طرحه على شعرها او (جزء منه) والقصه اللي مضروبه اصفر كناري منوره بره معرفش بتعمل ايه، بتقول للناس انها مش قرعه مثلا؟! واللبس بقه عباره عن اعلان متحرك لشركة كارينا بكل منتجاته، مايوه بكم مخلي ايديها اللي متربيه على الغالي شبه سلسله السدق، والبنطلون اللين

الأحد، 26 أبريل، 2015

اشتاتاً اشتوت

في ناس كده اللهم احفظنا تحس انهم ملبوسين او معفرتين والله اعلم. يصحى الصبح في يوم كده تلاقيه ظريف ولطيف ويسلم علي الناس كلها و الابتسامة تحس انها قاسمه وشه نصين بالعرض و يوم تاني او في نفس اليوم و ساعات في نفس الدقيقة برضه عينه في عينك كده و يقوم مدور وشه و ماشي ولا كأنه يعرفك.
ناس تانية بقه تلاقي يقولك انا هعملك و هسويلك و اللي تأمر بيه و هكذا وبعدبن لما تيجي تقوله فين يقولك فين ايه؟! هو انا قلت كده؟! و النيعمه ما حصل (فقدان مفاجئ في الذاكره)
ناس تالته بقه تقولك بحبك و بموت فيك و لو طلبت نجوم السمه اجبهالك، و لما تطلب منه طلب يعمل من بنها.
طب ليه هه ليه؟!
يعني خليك ثابت علي مبدأ يا تسلم يا متسلمش، يا تبقى قد وعدك يا متوعدش، يا تبقى اد كلامك يا مطنطقش .
مش انت لوحدك اللي عنده مشاكل عشان  تكشر في وش خلق الله او تعمل نفسك مش شايفهم عشان انت ((out of mood يعني تمت برمجتك علي مش هسلم علي حد.
اللي عمل نفسه شنتل مان او شنتل وومن برضه (يعني هي صغيره) ويقولك سيب المشكله او الحاجه دي عليا ده انا مفيش زيي اتنين فيها وهوب يصاب بالزهايمر المفاجئ متعملش فيها معلم وانت لسه يا دوب بتتعلم ( ده انا عليا جُمل :P (
نيجي بقه للناس اللي كلمها حاجه و فعلاها يعني حاجه *$%^*&^@*%^$# برضه بس تانيه خاااااالص احب اوجه رساله من موقعي هذا ACTION SPEAKS LOUDER اه الله زمبئولك كده.
وهنيالك يا فاعل الخير والثواب :D

الاثنين، 20 أبريل، 2015

يمين وشمال

فرق كبير اوي بين الدبلة في اليمين ولا الشمال عند الولاد والبنات.
بالنسبة  للبنات ((ladies first J وموضوع ليه  ladies first ده عاوز موضوع لوحده نتكلم عليه.

-         الدبلة في اليمين:

-          تبقى البنت لابسة الحته اللي علي الحبل بقه و شوياكه وميك اب (بغض النظر شكل الميك اب ايه برضه)
-          يخرجوا يقعدا في مكان رومانسي يتكلموا عن مستقبلهم و خروجاتهم و حياتهم بعد الجواز و تقعد تقوله ده انا هخليلك حياتك جنه يا روحي (ابقى قابلني) مش هنام غير لما اطمن علي راحتك (الراحة الابديه)
-          و فجأه تسمع بصوت واطي (تسوو) ايه ده يا حببتي تقولك سوري يا روحي كنت بعطس، دايقتك؟
-          ولو طلبتوا اكل بقه تاكل بطرف الشوكه  وكأنها بتبوسها و تاكل معلقتين و تقولك اوففف اكلت كتييير اوي يا bbe.
-          لو دخلتوا سينما و حصل اي منظر دموي يغمن عليها علي طول.

-         الدبلة في الشمال:

-          اللبس عباره عن بنطلون بجاما كستور ورثاها عن جدها وتيشرت  يفكرك عكت قصدي طبختلك ايه طول الاسبوع
-          الكلام كله ان المصروف مبيكفيش طلبات البيت وهي بتتكلم تلاقي فجأه الدنيا مطرت و هبت عواصف ورياح من حيث لا تدري (هاتشووووووووووووو) المودام عطست!!
-          الاكل عباره عن كائن بدائي بيأكل بحواسه الخمسه (انت وخيالك بقه)
-          يعني ايه سينما؟؟
بالنسبة للرجال (الدبلة في اليمين):
-          شياكه وساعه وبرفان و شوز واو.
-          بزخ السنين في كل الخروجات.
-          التحدث في كل الخروجات المستقبليه بصيغه (احنا و سوا و مع بعض)
-          وقت الاكل تسيبوا اصلا و تتفرج عليها وهي بيتاكل وتمطرها ببعض الكلام الرومانسي (ميضرش)
-          طلباتها اوامر حتي لو اضطريت تكتب شيكات علي بياض.
-          هدايا مناسبه و من غير مناسبة.
الدبلة في الشمال:
-          اللبس عبارة  عن بواقي بيجامتين معتز بيهم من ثانويه عامه و من صعب التعرف علي لونهم في الوقت
        الحالي لا يخلوا من بعض الطاقات  والشبابيك للتهويه J
-   الخروجات حرف النون طاااار في ثانيه :D
-          الفلوس الي كانت ببترمي يمين وشمال دي تقريبا كده عملهم عصافير و غربان وطاروا (في ايه معرفش)
-          وقت الاكل بيبقي ذكر الكائن السابق ذكره (تاخد الطبق منهم فلة، على الرشائه علي طول)
-          بالنسبه للطلبات (يحبسها في البيت من غير اكل ولا شرب لحد ما ياخد الشيكات Jاللي علي بياض
-          الهدايا تحولت من خاصية الارسال الي خاصيه الاستهبال
و يا بخت من وفق راسين في الحلال :P


السبت، 11 أبريل، 2015

عيد شم الفسيخ - شم النسيم سابقا -


غنت سعاد حسني زمان، الدنيا ربيع والجو بديع (في عيد الربيع) بغض النظر ان الجو ولا هو ربيع ولا بديع من اساسه وان فصل الشتا عمل REWIND، ده غير ان عيد شم الفسيخ  اللي هو عيد الربيع ولا EASTER علي رأى اخواننا الفرنجه قرب، كل سنه وانتوا شامين ان شاء الله، العيد ده له طقوس خاصه وعزيزه علي كل مصري منها طبعا قبليها بأسبوع تحضير العده زي نقع  الترمس والفول واللف علي الفسخانيه يدوروا على الفسيخ اللي رحته اوحش ياخدوه عشان متفسخ اكتر مثلا ، والله ما اعرف انهي الفسيخ الاحسن اللي رحتوا وحشه ولا اوحش ما علينا، الي جانب طبعا البصل و البيض واي منتج غذائي ينتج عنه غاز الميثااان (افهموها انتوا بقه) ليه معرفش ده لو جمعوا المكونات دي كلها (بيض وبصل وفسيخ وترمس وفول) هينتج عنه غاز يقضي علي السلاله البشريه جمعاااااااء. ليه كده يا جماعه ليه؟ نفسي افهم ميين اللي اخترع و طلع بالفكره ال..... النيره دي.
نرجع بقه ليوم العيد نفسه نلاقي العيله كلها ملمومه علي المكونات دي وهاتك يا اكل بغض النظر عن العواقب اللي انا شيفاها ان الواحد بعديها المفروض مينزلش من بيته 3 ايام لحد ما تزول عنه كل الاعراض رأفة بالبشر اللي حواليه  ده غير انك لو رحت زرت ناس في خلال الاسبوع ده (انفد بجلدك) يا بياكلوا فسيخ يا اكلوا (كل واحد وخياله بقه) هيشم ايه قصدي هيشوف ايه.
الحل: خد اجازه من شغلك اسبوع الي ان تنتهي هذه الاعراض، انا شخصيا بعمل زي WILL SMITH  في I am  legend. قعد في البانيوومعاه الرشاش بتاعه واقفل البيبان والشيابيك الي ان يختفي آكلي لحوم الفسيخ

وربنا ينتقم من اللي كان السبب :D

الجمعة، 10 أبريل، 2015

غرام وانتقام


من وجهة نظر البنت:
البنت قبل الجواز بيبقى عندها احلام واماني اللي هتححقها مع الامير اللي هيختاره قلبها اللي هو يا شبه جورج كلوني يا براد بيت  (علي اساس انها انجلينا جولي طبعا )، من الاحلام دي شقه و عربيه و لاسيما يعني سفر كل سنه في حته شكل ده غير انها هتخليه يحب كل حاجه هي بتحبها والعكس صحيح (هيييييييييح)، نرجع لارض الواقع بعد كام سنه ياعبيييييييير انت يا هااااااانم فيين فردة الشراب الفحلقي بتاعي، والله عال مافيش حاجه في مكانها في البيت ده، ايه ده مالك كده هه مالك؟ بقيتي مبهدلة فنفسك و فشكلتي كده و شعرك منكوش. ويكون هو كرشه طالع 3 متر قدام ممكن تفرشي عليه سفره لتلت افراد مرتاحين ودقنه ولا اهل الكهف تعرفي منها هو اكل وشرب ايه طول اليوم وحضرتك طول النهار ما بين طبيخ وغسيل ومواعين و تنضيف ورا سعادته وعياله و مش بتفضي حته تبصي في المرايه ده ان كنت لسه  فاكره مرايه يعني ايه.
من وجهه نظر الراجل:
الراجل قبل الجواز احلامه بالاميره بتعاته تبقي mix بين (امينه من بين القصرين وهيفا وهبي من .... بلاش عشان الرقابة وانها هتفهمه وتقدره و تخلي حياته جنه وتلبسه وتتشيكله طول النهار والليل و يحوش فلوس من مرتبه (ازاي معرفش) وياسلام بقه لو كانت بتنور في الضلمه كده  بقت ((full option
الواقع: يا حسين يا حسيييييين فين اللحمه اللي طلبتها والمكرونه و3كيلو الطماطم وراس الكرنبه و البتينجااااان واعمل حسابك انا عاوزه فلوس عشان اشتري فستان لخطوبة بنت عم ابن خالة ماما  ولما يقولها راجع تعبان ومفيش فلوس لكل ده، تتبرمج علي اسطوانة انت متجوزني تبهدلني ولا تجوعني ولا عاوز يقولو عليا ايه لما يشفوني لبست نفس الفستان مرتين!!! وانت تكون عندك بدله((multi tasking واحده لكل المناسبات
وجهة نظري انا:
متجوزيش الا لو كنت بتحبي عيوب خطيبك قبل مميزاته، متتجوزيش عشان خاطر عاوزه بنك متنقل او وسيلة لتحقيق رغبات وهوياتك من دون مراعاه لظروفه، ممتجوزيش الا لو كان بيخاف عليك بجد مش بيخاف عليك عشان تعرفي تخدميه و بيحب جوهرك مش مظهرك الخارجي، متتجوزيش الا لو كنت شايفه كرشه ده اكبر دليل انه بيحب اكلك. متتجوزيس الا لو كان عارف قيمتك و بيعاملك زي ملكته مش مليكته. لان ببساطه لو كل ده بيحصلك يبقى للاسف اخترتي غلط ومتجيش بعد كده تشتكي وتقولي كنت بحسب اني هقدر اغيره (كان غيرك اشطر)
متتجوزش لو كنت فاكر ان الجواز وسيله للرفاهيه بجميع انواها و انك هتبقى سي السيد و مش مطلوب منك غير انك تاكل و تشرب وتنام وتخرج (لوحدك طبعا)، ممتجوزش لو كنت عاوزها جاريه و طباخه وغساله وخدامه ليك ولولادك اتجوزها عشان بتحب اكلها اللي هي تعبانه فيه طول النهار وعملاه برجليها قصدي باديها وان سبب فشكلتها انها جابت لك ثلاث اربع قرود شبهك قصدي شبهكم انتوا الاتنين (علي الحياد اهه):D اتجوزها عشان انت بتحبها وعاوز تكمل عمرك معاها وهي منكوشه ومبهدلة ومفشكلة وريحتها طبيخ ولبن ودوا في آن واحد ومع ذلك هي في نظرك ملكة جمال الكون كلة.
وربنا يقدرنا علي فعل الخير :)


الأربعاء، 8 أبريل، 2015

حواء والسيلفي


ظهرت ظاهرة جديده في سماء المحروسه وعلي رأس حواء تحديدا وهي السيلفي بعد ما كان الواحد بيحاول يداري انه بيصور نفسه حتي لو وصلت انه يربط الكاميرا في النجفه بايشارب الوالده و يظبتها علي السيلف تايمر (بغض النظر عن العواقب الوخيمه بعدها وصولا الي الشبشب الطائر)، وطبعا لكل ظاهره شروط يجب ات تتوافر بها :
-          Duck face: هو عباره عن بوز متين مع احمر شفاه بلون التوت البري
-          تاتو ببعض المناطق (الكتف او الرقبه) وجبت الظهور برضه للسوكسيه بقى وكته.
-          يجب ان تكوني دبه راسك في تورته كريمه او طبق الجبس من اللي تحت الحوض (حسب ما انت عاوزاه يكون long lasting ولا لأ:D)
-          العنين يا جماعه(سحر العيون) لازم يبقي winged eye liner  او مشروعwinged eye liner وفشل.
-          البوء بقه فتحاه تعدي منه عربيه نقل بدورين مع نظره بلاهه (قال يعني عامله متفاجأه)
-          لو حضرتك سمراء لازم تلعبي في effects الصوره باي شكل عشان تباني افتح (هتتقفشي برضه:P)
-          اخيرا بقه لازماً ولابد تكون في الحمااااام عشان تبقى في اكتر مكان بترتاحي فيه.
ياللا على رأي جدتي الله يرحمها دع الخلق للخالق تيجوا ناخد سيلفي بقه؟ ;)